‘‘ภุญฺชติ อนวชฺชานิ, สาวชฺชานิ น ภุญฺชติ;
ฆาสมจฺฉาทนํ ลทฺธา, สนฺนิธิํ ปริวชฺชยํฯ
[699]
‘‘สํโยชนํ อณุํ ถูลํ, สพฺพํ เฉตฺวาน พนฺธนํ;
เยน เยเนว คจฺฉติ, อนปกฺโขว คจฺฉติฯ
[700]
‘‘ยถาปิ อุทเก ชาตํ, ปุณฺฑรีกํ ปวฑฺฒติ;
โนปลิปฺปติ โตเยน, สุจิคนฺธํ มโนรมํฯ
[701]
‘‘ตเถว จ โลเก ชาโต, พุทฺโธ โลเก วิหรติ;
โนปลิปฺปติ โลเกน, โตเยน ปทุมํ ยถาฯ
[702]
‘‘มหาคินิ ปชฺชลิโต, อนาหาโรปสมฺมติ;
องฺคาเรสุ จ สนฺเตสุ, นิพฺพุโตติ ปวุจฺจติฯ
[703]
‘‘อตฺถสฺสายํ วิญฺญาปนี, อุปมา วิญฺญูหิ เทสิตา;
วิญฺญิสฺสนฺติ มหานาคา, นาคํ นาเคน เทสิตํฯ
[704]
‘‘วีตราโค วีตโทโส, วีตโมโห อนาสโว;
สรีรํ วิชหํ นาโค, ปรินิพฺพิสฺสตฺยนาสโว’’ติฯ
… อุทายี เถโร…ฯ
โสฬสกนิปาโต นิฏฺฐิโตฯ
ตตฺรุทฺทานํ –
โกณฺฑญฺโญ จ อุทายี จ, เถรา ทฺเว เต มหิทฺธิกา;
โสฬสมฺหิ นิปาตมฺหิ, คาถาโย ทฺเว จ ติํส จาติฯ
16. วีสตินิปาโต
1. อธิมุตฺตตฺเถรคาถา
[705]
‘‘ยญฺญตฺถํ วา ธนตฺถํ วา, เย หนาม มยํ ปุเร;
อวเสสํ [อวเส ตํ (สี. อฏฺฐ. มูลปาโฐ), อวเสสานํ (อฏฺฐ.?)] ภยํ โหติ, เวธนฺติ วิลปนฺติ จฯ
[706]
‘‘ตสฺส เต นตฺถิ ภีตตฺตํ, ภิยฺโย วณฺโณ ปสีทติ;
กสฺมา น ปริเทเวสิ, เอวรูเป มหพฺภเยฯ
[707]
‘‘นตฺถิ เจตสิกํ ทุกฺขํ, อนเปกฺขสฺส คามณิ;
อติกฺกนฺตา ภยา สพฺเพ, ขีณสํโยชนสฺส เวฯ
[708]
‘‘ขีณาย ภวเนตฺติยา, ทิฏฺเฐ ธมฺเม ยถาตเถ;
น ภยํ มรเณ โหติ, ภารนิกฺเขปเน ยถาฯ
[709]
‘‘สุจิณฺณํ พฺรหฺมจริยํ เม, มคฺโค จาปิ สุภาวิโต;
มรเณ เม ภยํ นตฺถิ, โรคานมิว สงฺขเยฯ
[710]
‘‘สุจิณฺณํ พฺรหฺมจริยํ เม, มคฺโค จาปิ สุภาวิโต;
นิรสฺสาทา ภวา ทิฏฺฐา, วิสํ ปิตฺวาว [ปีตฺวาว (สี.)] ฉฑฺฑิตํฯ
[711]
‘‘ปารคู อนุปาทาโน, กตกิจฺโจ อนาสโว;
ตุฏฺโฐ อายุกฺขยา โหติ, มุตฺโต อาฆาตนา ยถาฯ
[712]
‘‘อุตฺตมํ ธมฺมตํ ปตฺโต, สพฺพโลเก อนตฺถิโก;
อาทิตฺตาว ฆรา มุตฺโต, มรณสฺมิํ น โสจติฯ
[713]
‘‘ยทตฺถิ สงฺคตํ กิญฺจิ, ภโว วา ยตฺถ ลพฺภติ;
สพฺพํ อนิสฺสรํ เอตํ, อิติ วุตฺตํ มเหสินาฯ
[714]
‘‘โย ตํ ตถา ปชานาติ, ยถา พุทฺเธน เทสิตํ;
น คณฺหาติ ภวํ กิญฺจิ, สุตตฺตํว อโยคุฬํฯ
[715]
‘‘น เม โหติ ‘อโหสิ’นฺติ, ‘ภวิสฺส’นฺติ น โหติ เม;
สงฺขารา วิคมิสฺสนฺติ, ตตฺถ กา ปริเทวนาฯ
[716]
‘‘สุทฺธํ ธมฺมสมุปฺปาทํ, สุทฺธํ สงฺขารสนฺตติํ;
ปสฺสนฺตสฺส ยถาภูตํ, น ภยํ โหติ คามณิฯ
[717]